Erlend lán

Ríkissjóður Íslands gaf í dag út grænt skuldabréf að fjárhæð 750 milljónir evra, jafnvirði um 111 milljarða króna. Skuldabréfin bera 3,5% fasta vexti og voru gefin út til 10 ára á  ávöxtunarkröfunni 3,636%. Skuldabréfin eru gefin út undir sjálfbærum fjármögnunarramma ríkissjóðs.

Fjárfestar sýndu útgáfunni mikinn áhuga og nam eftirspurn um 7 milljörðum evra eða rúmlega nífaldri fjárhæð útgáfunnar. Fagfjárfestahópurinn samanstendur af seðlabönkum, bönkum, tryggingafélögum og öðrum fagfjárfestum, aðallega frá Norður-Evrópu. Umsjón útgáfunnar var í höndum JP Morgan, BNP Paribas, DZ bank og Nomura.

„Það er einkar ánægjulegt að sjá það mikla traust sem fyrstu útgáfa grænna skuldabréfa fær frá fjölbreyttum hópi alþjóðlegra fjárfesta. Þetta er til marks um trúverðugleika stefnu okkar í ríkisfjármálum og umhverfismálum, sem undirstrikar þær alþjóðlegu skuldbindingar sem við höfum tekist á hendur. Þessi mikli áhugi er ekki síður til marks um það traust sem fjárfestar bera til Íslands og ímynd landsins sem fyrirmyndar á sviði umhverfismála,“ segir Þórdís Kolbrún Reykfjörð Gylfadóttir, fjármála- og efnahagsráðherra. 

Fjárfestahópurinn taldi um 280 aðila sem er mesti fjöldi sem tekið hefur þátt í einstöku útboði á erlendum skuldabréfum ríkissjóðs. Níföld heildareftirspurn var að sama skapi án fordæmis.

„Útgáfan nú er í samræmi við þá stefnu sem við höfum sett fram í lánamálum og er hluti af aðgerðaráætlun í loftslagsmálum. Andvirði útgáfunnar verður nýtt til að mæta kostnaði ríkissjóðs vegna umhverfismála á næstu árum. Fjármögnunin styrkir getu okkar til að mæta enn frekar þeim áskorunum sem við stöndum frammi fyrir. Rífleg eftirspurn og kjör ríkissjóðs bera einnig með sér traust á stjórn efnahags- og ríkisfjármála, " segir Þórdís Kolbrún Reykfjörð Gylfadóttir.

Ríkissjóður Íslands gaf í dag út skuldabréf að fjárhæð 750 milljónir evra, jafnvirði um 117 milljarða króna. Skuldabréfin bera 0% fasta vexti og voru gefin út til 7 ára á  ávöxtunarkröfunni 0,117%.

Fjárfestar sýndu útgáfunni mikinn áhuga og nam eftirspurn tæplega 3,5 milljörðum evra eða rúmlega fjórfaldri fjárhæð útgáfunnar. Fjárfestahópurinn samanstendur af bönkum, tryggingafélögum og öðrum fagfjárfestum, aðallega frá Norður-Evrópu. Umsjón útgáfunnar var í höndum Citibank,  Barclays og Deutsche Bank.

„Viðbrögð fjárfesta eru til marks um greiðan aðgang ríkissjóðs að alþjóðamörkuðum og endurspegla traust á styrk okkar og getu til þess að mæta efnahagslegum afleiðingum heimsfaraldursins. Með þessari lántöku treystir ríkissjóður en frekar stöðu sína til lengri tíma, en lausafjárstaða ríkissjóðs er mjög góð um þessar mundir,“ segir Bjarni Benediktsson fjármála- og efnahagsráðherra. 

Í útboðsferlinu bötnuðu kjör ríkissjóðs um 12 punkta frá fyrstu verðleiðsögn. Fjárfestahópurinn taldi vel yfir 150 aðila.  

„Útgáfan nú er í samræmi við stefnu í lánamálum, en aukinni fjárþörf ríkissjóðs á næstu árum verður að hluta til mætt með erlendri lántöku eða með því að hagnýta gjaldeyriseign ríkissjóðs í Seðlabanka Íslands. Markaðsaðstæður eru sérlega hagstæðar um þessar mundir eins og kjör ríkissjóðs nú bera með sér, " segir Bjarni Benediktsson.

Ríkissjóður Íslands gaf í dag út skuldabréf að fjárhæð 500 milljónir evra, jafnvirði um 76 milljarða króna. Skuldabréfin bera 0,625% fasta vexti og voru gefin út til 6 ára á  ávöxtunarkröfunni 0,667%.

Fjárfestar sýndu útgáfunni mikinn áhuga og nam eftirspurn um 3,4 milljörðum evra eða nærri sjöfaldri fjárhæð útgáfunnar. Fjárfestahópurinn samanstendur af seðlabönkum og öðrum fagfjárfestum, aðallega frá Evrópu. Umsjón útgáfunnar var í höndum Citi,  JP Morgan og Morgan Stanley. 

„Þessi lántaka er staðfesting á greiðum aðgangi ríkissjóðs að fjármagni á alþjóðamörkuðum og sýnir tiltrú fjárfesta á þann viðnámsþrótt sem byggður hefur verið upp á síðustu árum. Hún eykur getu okkar til að mæta afleiðingum heimsfaraldurs kórónuveiru og endurspeglar mikinn styrk og getu til að sigrast á efnahagslegum afleiðingum hans.“ segir Bjarni Benediktsson fjármála- og efnahagsráðherra. 

Í útboðsferlinu bötnuðu kjör ríkissjóðs um 30 punkta vegna mikillar eftirspurnar. Vel yfir 200 aðilar sýndu útgáfunni áhuga, eða um helmingi fleiri aðilar en í síðustu útgáfu ríkissjóðs, og heildareftirspurn nam um sjöfaldri útboðsfjárhæðinni.

„Útgáfan er í samræmi við stefnu ríkissjóðs í lánamálum, auðveldar aðgengi annarra innlendra aðila að erlendum lánsfjármörkuðum og staðfestir greiðan aðgang ríkissjóðs að stórum og fjölbreyttum hópi fjárfesta. Markaðir hafa verið líflegir að undanförnu enda eru mörg ríki í sömu sporum, að tryggja sér fjármagn til lengri tíma," segir Bjarni Benediktsson.      

Ríkissjóður Íslands hefur í dag gefið út skuldabréf að fjárhæð 500 milljónir evra, eða að jafnvirði um 71 milljarði króna.  

Skuldabréfin bera 0,1% fasta vexti og eru gefin út til 5 ára á ávöxtunarkröfunni 0,122%. Þetta eru hagstæðustu vextir í sögu lýðveldisins. Fjárfestar sýndu útgáfunni mikinn áhuga og nam eftirspurn um 2,5 milljörðum evra eða ríflega fimmfaldri fjárhæð útgáfunnar. Fjárfestahópurinn samanstendur af seðlabönkum og öðrum fagfjárfestum, aðallega frá Evrópu. Umsjón útgáfunnar var í höndum Barclays, JP Morgan, Morgan Stanley og Nomura. 

I aðdraganda nýju útgáfunnar gerði ríkissjóður tilboð í útistandandi fjárhæð eldri skuldabréfaútgáfu frá árinu 2014,  sem nam upphaflega 750 milljónum evra. Eigendur bréfa að nafnvirði um 60 milljónum evra eða um 8,5 ma.kr. tóku tilboði ríkissjóðs til viðbótar við þær 398 milljónir evra sem keyptar voru til baka í desember 2017. Þeir fjárfestar sem tóku þátt og vildu, fengu forgang í nýju útgáfunni.